నేటినుంచి అందుబాటులో కానిస్టేబుల్ హాల్టిక్కెట్లు...

తెలంగాణ రాష్ట్ర పోలీసు కానిస్టేబుల్ తుది పరీక్షకు హాజరయ్యే అభ్యర్థులు నేటి(ఈ నెల 15) నుంచి 21వ తేదీ అర్ధరాత్రి లోపు తమ ప్రవేశపత్రాల(హాల్టిక్కెట్లు)ను డౌన్లోడ్ చేసుకోవాలని తెలంగాణ పోలీసు నియామక మండలి ఛైర్మన్ పూర్ణచంద్రరావు తెలిపారు. ఈ మేరకు ఆయన శుక్రవారం ఒక పత్రికా ప్రకటన విడుదల చేశారు. ఈ నెల 23వ తేదీన సివిల్, సాయుధ, ప్రత్యేక పోలీసు విభాగాలకు చెందిన కానిస్టేబుల్లతోపాటు అగ్నిమాపకశాఖకు చెందిన ఫైర్మెన్ ఉద్యోగాలకు తుది పరీక్ష నిర్వహిస్తున్న విషయం తెలిసిందే. ప్రాథమిక పరీక్ష, దేహదారుఢ్య పరీక్షల్లో ఉత్తీర్ణులైన వారికి ఈ పరీక్ష నిర్వహిస్తున్నారు. దీనికి సంబంధించిన హాల్టిక్కెట్లు 15వ తేదీ సాయంత్రం 4 గంటల నుంచి నియామక మండలి వెబ్సైట్ ద్వారా డౌన్లోడ్ చేసుకోవాలన్నారు.

రిజిస్ట్రేషన్ నెంబరు, రిజిస్ట్రేషన్ చేసుకున్న చరవాణి నంబరు, ఎస్సెస్సీ, తత్సమాన పరీక్ష హాల్టిక్కెట్టు నంబరు నమోదు చేయడం ద్వారా హాల్టిక్కెట్టు పొందవచ్చని ఆయన వివరించారు. ఏవైనా సమస్యలు తలెత్తితే support@tslprb.in ద్వారా కానీ 040-23150362, 040-23150462 నంబర్లలో కానీ సంప్రదించాలని సూచించారు.